Furlan come il gjaponês

Ogni tant mi plâs scrivi haiku. E ce sono? Us domandarês. Ben po’ ce mût no lu savês? A ogni mût prin us al dîs, dopo us fâs un esempli, e dopo une riflession.

Alore, cirint di taiâ curt, un haiku a è une piçule poesiute gjaponese fate di dome trê viers. Il prin e il tierç a son fats di cinc silabis, chel di mieç di siet.
No stoi chi a contâus tantis robis su haiku e sui mestris orientai che ju àn inventâts e partats indenant. Us basti savè che a son une da lis formis di poesie plui antighe dal Gjapon e ca son milions di personis al mont che a scrivin cuotidianementri haiku.
Ce mût si scrivino?

Alore, tant par començâ ogni haiku a l’è peât a une stagjon. I gjaponês lu clamin “kigo”. No, par furlan, a podin clamâlu semplicementri “stagjon”.
Esistin cussì haiku d’unvier, d’istât, di primevere e d’autun, ca son chei ca veis di scrivi cumò, par capîsi.

Seconde robe. I haiku àn di sedi sempliçs, e àn di descrivi un moment, un lamp di nature. Si dîs che un grant mestri di haiku al è tâl se, ta la so vite, al scrîf dome dîs grancj haiku.

Tierce robe. I haiku àn di rapresentà un dai cuatri stâts fondamentâi dal anim dal om, rispiet a la nature, e a saressin:

1. SABI – IL SILENZIO. Chel sarès il sintiment dal stâ cuiets, cidins, di bessôi… Jo par furlan a cjacararès di “pâs”
2. WABI – L’INATTESO, IL RISVEGLIO DELL’ATTENZIONE. Chi al è dificil di spiegâ, si cjacare di chel sintiment ca ti fâs acuarzi di sedi vîf. Di un particolâr ca ti fâs rindi cont da la belece da la nature ator. Podaressin clamâlu “il rindisi cont”
3. AWARE – LA NOSTALGIA, LA TRANSITORIETÀ Chi forsit l’è plui dificil fasi capì. Al sarès il sintiment da la nostalgjie, dal remenâ i pensîrs. Jo lu clamarès “il timp che al passe”
4. YUGEN – IL MISTERO, L’INAFFERRABILE Chi secont me al è plui facil di tradusi: la “maravee” chel sarès chel moment in cui si rindisi cont di trop biele ca è une robe semplice, che apont, nus maravee.

Speri di veus incuriosît, ancje parcè son za in tancj che scrivin haiku par furlan, ma no l’è un mâl se n fos cualchidun di plui. Par cui, ogni tant su chestis pagjinis o cjatarês un haiku par furlan. Chi sot al è il prin:

Scûr e al sbivicje
Lis cocis àn i voi
Lis fueis van ator

No stait a famal spiegâ, la stagjon si capis dal secont viers, cal cjacare di halloween. Il tierç al varès di mostrâ sie il timp che al passe (li fueis ca morin), sie il rindisi cont (che lis fueis, si stachin dai arbui par la a viodi un mont ca no a vevin mai podût viodi prin).

E cumò doi pensîrs, che jo cjati une vore biei.

Il prin al è il rindisi cont che la marilenghe à une grande cualitât: si po’ dì un grum di robis cun pocjissimis silabis. In chest à è tant simile al gjaponês. Pensait dome al prin viers da l’haiku parsore: “Sbivicje” a è une peraule che a cree za un mont di bessole, ben diferent di dî “al plûf”. E par talian no stait nancje provâ a tradusi.

Un secont pensîr al è chest:: l’haiku gjaponês al è peât in maniere fuartissime al ambient, a la nature. E il furlan, no isal compagn? Vonde. Par vuê ai scrit ancje masse! Mandi a ducj, e mi racomandi, provait a scrivi haiku in marilenghe!