Cîl Glaçât

Festintenda, Teatri e vâs di vuès

2010-05-14T14:18:00.000-07:00

Vuê us lassi dôs cjacaris sul Festintenda e il me cronic no rivâ mai a lâ come che al coventarès là.

Lassin stâ che fin a chê altre dì o jeri convint che al duràs trê setemanis e no cuatri, come che invezit al dure.

E lassin stâ ancje che ogni an o mi dîs: o ai di lâ plui spes o ai di lâ plui spes o ai di lâ plui spes, e invezit a va simpri a finîle che o rivi a fâmi si e no un pâr di seradis.

Cjale usgnot, che a larès vulintîr a viodi i Tre Allegri Ragazzi Morti (fracàit il link, se soredut o sîs di Pordenon), ancje se il disc gnûf no mi entusiasme (ma al è biel) e invezit o scugni scjampâ a cene.

Bon.

Ma chescj a son problemis miei, che al è inutil marcâ, parcè che si sa che lis robis di fâ a son infinidis e no a sin une persone sole e ven a stâi che no covente tirâ fûr l'analisi matematiche e nancje che dai miedis par capî che no je une soluzion. Bisugne contentâsi di fâ un pôc di dut.

In ogni câs chê altre setemane o soi stât a viodi la serade dai "Il Teatro degli Orrori" e mi soi divertût e il conciert a mi è plasût ancje avonde (ancje se i tocs cui arcs eletrics a jerin di dismenteâ par problemis tecnics e, in vie di massime, no mi parevin cuissâ cè ispirâts e volenterôs di spacâ). Capovilla, cun di plui, mi pareve cuasit tirât, e no fûr cu la cassele come par solit (e in ogni câs a nol jere cjoc spacât, il che forsit al à zovât a la durade dal conciert). O ai ancje viodût che sul tubo, cualchidun che al devi jessi stât un pâr di metris denant di me, al à poiât une vore di videos. La cualitât e je ce che e je, ma o podês fâsi une idee.

Anzit

Ve chi che us ficji il video di une des miôr cjancjons dal ultin disc:

Lassant stâ i concierts che a son stâts us dîs ancje che o rivarai a lâ ancje doman di sere a viodi il mê compaesan, ancje par talpinâlu un pôc che se no chel no mi fâs adore il lavôr che al à di fâmi :)

Ah scusait, o stoi cjacarant dai Jar of Bones, che aromai o ai viodût vonde voltis, ma si che a sunin a mortean, al è come che fos une robe nostalgjiche, viodût che al è un palc dulâ che a àn sunât cuant che e je stade la stafete jenfri bassiscj (nomo bombo) e un dai prins dulà che a àn començât a spacâ.

Insome, dut chest par dîs che se doman o sês libars vignît a viodi i Jar che rivin ancje a bevisi une bire, o ancje dôs, che tant o ai za decidût che par tornâ a lignan dopo o fâ vuidâ la murose (ancje se je ancjemò no lu sa)

Mandi!

Il cartel par la Udinese cul Bari

2010-05-11T13:52:00.000-07:00

Bon sù! No podevi fâ di mancul di meti ancje l'ultin cartel de stagjon, chel che al sperave intal centesim gol di Totò e chel maladet 'nd à fats doi, tant par fâmi dispiet :)

A ogni mût miôr cussì. Cumò sperìn intun biel 5-5 cu la lazio e cinc goi di Totò che cussì magari al sorpasse ancje Messi. :D

Il cartel par la Udinese cul Siena

2010-04-25T03:24:00.000-07:00

Udin, Rome e una cope par la onestât

2010-04-22T13:11:00.000-07:00

Îr o soi stât al stadio, a viodi la partide.
Jo di solit no voi, a viodi l'Udin. Al sarà stât almancul un pâr di agns che no metevi pîr al Friuli e l'ultime volte o pensi che al devi jessi stât par i Red Hot.
Mi soi pensât cussì dal parcè che no mi plâs viodi lis partidis.
Par television al è un cont, o cjali il balon, lis tatichis, la tecniche...
Ma dal vîf a mi è impussibil. O cjali la partide e o deventi tifôs e îr pensi che in tal ultin cuart d'ore o ai di vê tirât jù plui crostis che in tai ultin cinc agns.
No sai se si pues dî che l'Udin nol vedi meretât di vinci, ma di sigûr si pues dî che la Rome e à meretât di pierdi.
Une scuadre vergognose, cun cualchi zuiadôr vergognôs, a livel di persone.
Un che intant che al cole su la tre cuarts di chê altre scuadre e al cîr di tirâi une pidade ta la muse a l'aversari non merete un cartelin, ma une denunce un cualchi mês di pereson.
Un che al tire une comedonade tal stomi compagn.
Il stes che a si dîsi par il fal su Sanmarco, dopo che al veve butât vie la bale di no sai trop.
I fâi, tal balon, a son normâi. Anzit, a son part dal balon.
Pestâsi di pueste propit al è cuintri il sport e in tal moment stes che un a si compuarte cussì al varès di jessizi neât il dirit di fâ sport.
Zontìn ancje che l'arbitri al à fat fente di no viodi cuasi simpri...
(se no inte finâl cul inter a varessin zuiât mieçs di chei romaniscj di îr di sere)
Insome, se prime o tifâvi rome, par il scudet, di vuê o tifi murino, che al vinci dut, che almancul al è un biel om, e no come taddei, che al pues interpretâ un film horror cence bisugne dal trucadôr.
Ah, e je lade mâl, îr, ma almancul soi vignût fûr dal stadio content di vêi batût lis mans a chei che a stavin da la bande juste. E podopo, a mi è bastât viodi a zuiâ Sanchez, par savê ce che al vûl dî spudâ balins e molâ mai.
E cun chist ve chi il cartel de partide di îr, che almancul la cope par vê zuiât cun onestât la vin vinte nô:

Il cartel par la Udinese cul Bologne

2010-04-20T13:33:00.000-07:00

Difat no vin vint e o vin gjoldût pôc. Ma in ogni câs ve chi il cartel pe partide di domenie stade...
e cumò sot a pensâ chel pe Rome.

Van de Sfroos a Pordenon

2010-04-19T14:59:00.000-07:00

Alore.

Se un a nol cognòs Davide Van de Sfroos al è impussibil spiegâi in cheste cuatri riis cui che al è. Miôr che si fâsi un zîr pal web e al sinti alc par youtube, o magari alc lu met dopo finît chestes riis.

Vinars stât De Sfroos al jere a Pordenon, al Deposito Giordani, e jo par un pêl m'al pierdevi. Lu ai scuviert la dì prin di un trafilet volant let no mi visi dulà e insome, pos crodi se no levi!

De Sfroos lu ai cognossût cul disc Breva e Tivan, che m'al veve prestât une amie fiorentine in chei agns dulà che i CD si masterizavin e cuntun grum di fature. A mi sul imprin no mi jere plasût masse, o miôr, cualchi robe mi jere plasude une vore, ma tal complès no lu vevi scoltât masse.

A jerin timps dulà che il so cjantâ par laghee, il dialet comasc dal lâc, a lu viodevi ancjemò come une robe di nicchie, che mi faseve simpatie e che e coventave soredut par cjantâ robis ironichis; cjançons cun batudis e garbatui lenghistics. Mi plaseve di murì, par dî une, "El fiu del Guglielmo Tell" o "La Balera", che a jerin i tocs plui zuiarins.

Cumò 'nd è corude aghe sot i puints e soredut musiche tes mes orelis e notis inte ghitare di De Sfroos.

Nol è dome brâf, al è scuatis perfet.

Pica!, lu dîs cence pôre, al è un dai miôr discs vignûts fûr in Italie tai prin dîs agns dal Vincjeunesim secul. Almancul secont me, ma no crôt di jessi l'unic a pensale cussì. Cjançons che a contin une storie, misturant blues, rock, folk e lenghis diferentis intune maniere che e rive a jessi taronde e origjinâl.

E soredut fruibile.

Al è forsit un pecjât che il doprâ il laghee al dedi cuanchi cjavece a chest disc.

No altris furlans a varessin di cjapâ di esempli.

Di spes, e al è un discors che o ai viodût e sintût fâ in plui bandis, al somee che cuant che si à di produzi alc par furlan al basti chest par dâi une dignitât superiôr.

No je vere.

Une biele cjançon e je biele in ogni lenghe. Plui o mancul, sigûr, ma produzi une robe di cualitât al ven prin che la lenghe doprade par fâlu.

De Sfroos al tire fûr cjançons di cualitât.

Tant al è vêr che intal ultin disc si cjatin sedi par laghee, sedi par talian.

Dit chest dôs peraulis sul concert.

Biel.

No bielissim, no particolâr, ma biel. Di chei che ti lassin content, che ti fasin sintî un che al à gust di sunâ e sudâ e cjantâ par te che tu sês li a viodilu. Si viodeve che forsit a jerin stracs, par che a son in tour di une vite. Ma nissun al si è sparagnât.

Violin, ghitare, fisarmonighe/tastieris, bas, batarie e vos/ghitare a àn dât dut ce che podevin.

Metât vecju repertori e metât Pica!

Framieç il cjacarà cabarettistic di Davide, il so contâ lis cjançons.

Al un ator e si viôt.

E al è un poete e scritôr, e si sint.

Se us capite, se al torne des nestres bandis a sunâ, benpo, no stêt vê nancje un dubi. Vait!

E vonde.

Achì sot cualchi video:

"La nape" di Gianfranco Pellegrini

2010-04-07T17:25:00.000-07:00

Si rindêso cont che o ten chest librut sul soiâr dongje dal ordenadôr di passe sîs mês?

"La nape" lu ai let a Setembar, la domenie dopo che Gianfranco Pellegrini, l'autôr, mal à regalât. Mi visi che in chê volte mi jere plasût, ma cumò che la storie e jere restade lontane a mal soi tornât a lei, ca e là, e mi è tornât subit in inment dut.

Lu ten achì par che no cjatâvi mai la ispirazion par butâ jù dôs peraulis su chest puar blog, ma no vevi nancje voie di metilu in bande.

In fin dai conts, o pensi, ancje un piçul post al covente.

Par dî une, se cumò o meteis su google il titul par cirî imagjinis a cjatais la cuviertine. Prime no.

Duncje, ce libri isal e di ce al cjacarie?

Al è un libri par fruts, al nas dal premi Vilagnovele dal Judri 2007 e e je la publicazion di une conte premiade in chê edizion. Sore la conte, come che a podês viodi de imagjine, a son i dissens di Marisa Moretti e une jentrade e une poesie finâl di Bepi Mariuz.

La conte no je lungje e lu si lei in mancul di une ore, ancje se un frut, di sigure, i met un momenti di plui.

Ce contie la conte?

Une aventure tirade dongje cuntune analessi che e cjape dute la part centrâl dal libri.

Incipit e sierade a son invezit cjapadis al presint, ancje se rivuardin simpri Gjovanin, aromai vieli, che denant da la nape, apont, si vise de sô zoventût e di cuant che al jere rivât a tirâ dongje une gruesse cjoce, dal bosc plen di nêf, che daspò al à scugnût lassâ al paron e al so fatôr.

Nuie di cè, vere?

Invezit no.

No parcè che la conte e je soredut simboliche e i vûl cirût la seconde leture e i significâts che l'autôr al à volût dâ a dute la storie. O vin un presint fat di nevôts che a zuin cu la play station, di cjasis comandadis di monitors al plasma, di modernitâts che aromai a àn sdrumât lis tradizions. E reste la nape, o almancul il fîl che Gjovanin al pee a cheste par tornâ piçul e tornâ, cu la memorie, tal bosc, in timps dulâ che una cjoce, puartade cjase, e podeve fâ la diference. Dopo la conte si torne a sierâ tal presint, cul cercli de vite che al è toront e al puarte e domandâsi se lis direzions che a cjapìn a sedin chês justis.

Insome, al va let cun atenzion, se no si è plui fruts, chest librut.

Al è un at che al ponte il dêt sul avent de tecnologje, ma no un dêt acusatori.

La indicazion che l'autôr al à voie di dânus e je di une altre fate.

Nus vûl insegnâ di no butâ vie nuie, di filtrâ ce che al rive cun ce che di miôr si à.

Nuie di gnûf, forsit, ma intune epoche dulâ che la educazion a la modernitât e ven ignorade (pensait dome a trop che e mancje ai nestris fruts une educazion morâl informatiche o la netiquette) contis di cheste fate a coventin!

Il cartel par la Udinese cu la Juve e i auguris

2010-04-02T15:43:00.000-07:00

O cjapi la ocasion dal cartel par la partide di doman par fâ i auguris di Buine Pasche a ducj chei che par câs a passin par chi. Mandi a ducj!

E ve chi la imagjine al Stadio:

"La Comugne n. 17" di AA VV

2010-03-29T15:51:00.000-07:00

Nol è propit un libri, La Comugne edite de Kappa vu, ma pôc i mancje, jessint une riviste leterarie che e mostre une personalitât une vore dongje a chê di un libri.

O confessi che, a part il numar prin di chel chi e un altri milante agns indaûr, non ai mai vût ben presint cheste riviste. Cumò che o scrîf par furlan e che, soredut, o lei une vore di plui in marilenghe, o soi rivât adore a cognossile miôr e a vê presint il lavôr che al stâ daûr.

Cussì o mi cjapi il timp che al covente e, man man che ju lei, us disarai alc dai ultin trê numar jessûts, 17, 18 e 19.

Comencìn cun chest numar 17.

Alore. Us dîs subit che mi è plasût une vore ancje dal pont di viste estetic. Lis imagjinis, di fat, a son cjoltis dal archivi de associazion "Trois" di Rivignan e a rapresentin vecjis fotografiis che son stadis cjapadis sù tor pes cjasis e digjitalizadis. Dentri 'nd è di maraveosis e crodeimi che za chês a valin mieze riviste. Dopo, tant par fâus capî, us met une di chês che mi plasin di plui.

De bande de sagjistiche, daspò, si vierç la riviste cuntun bielissim articul su lis traduzions, di Stefano Montello, che al rispuint a une domande che no crôt di jessi l'unic a jessimi fat: ce sens aial voltâ i scrits intune altre lenghe e, in tal nestri câs, intune lenghe piçule, come il Furlan?

Une rispueste, chi dentri, la cjatais, e a merete jessi lete.

Daspò di chest articul e ven une des robis che mi son plasudis di plui, metude lì propit par fâ capî miôr il discors sul traduzi. Vêso presint Borges? No, no il tenist, chel al è Borg. O stoi cjacarant dal grant scritôr argjentin. Ben, vêso presint la sô conte "I teologi" publicade in te racuele "L'Aleph". Ben po, Alessandra Kersevan e à vût il coraç di voltâle par furlan e e je vignude fûr une conte che e à la stesse carateristiche di che che o vevi let par talian: no tu capissis nuie, ma ti plâs di murì!

Provâ par crodi.

Daspò di chest e ven la narative furlane. Une conte autobiografiche di Stefano Gasti che nus conte, cun realism e ironie, di cuant che al stave par voltâ i scarpets, cualchi timp indaûr.

Dopo e ven la mê conte che cjacare di doi araps che a cirin di imparâ il furlan.

Il vêr toc di narative però al è chel che al ven dopo. Gianfranco Pellegrini al misture dôs ambientazions, une cuasit fantasy/preistoriche, che e viôt l'om ancjemò vistût di piels di lôf, e une fantasientifiche , che lu viôt invezit in grât di cambiâ cuarp cence cambiâ cjâf. Un bielissin lavôr. Cence dubit chel che ti reste di plui e chel che al à plui cualitât leterarie, dentri di chest numar.

A sierin la rivist doi tocs di Laurin Zuan Nardin che a pontin viers un public plui bas di etât, platant alegoriis e zûcs di peraulis daûr di dôs storiis une vore zuarinis.

Benon.
No sai dîs di chei altris doi numars, che o ai ancjemò di leiiu (cemût si scrivial "leiiu" a proposit?)
Ma chest al è une vore bon. Vait a cirîlu.
E cumò ve chi la imagjine:

"Scûr di lune" di Checo Tam

2010-03-25T18:28:00.000-07:00

Duncje.

Viodin se o rivi adore a meti man in maniere serie a chest blog.

E maniere serie, par me, al vûl dî cjacarâ di libris. In chest câs, un libri par furlan.

Tant par començâ, za inte dî de jessude, la Istât passade, chest libri mi veve un pôc stiçât.

Vûstu pal fat che o ai un debul par chest formât di libruts de kappa vu, vûstu parcè che lei par furlan e je ancjemò une ativitât che mi cjape plui timp che par talian e par chest mi plasin lis contis, o vevi voie di cjolilu.

Daspò al è capitât che il Checo lu ai cognossût e mi à fat di letôr intal vagon, e alore, no podevi plui fâ di mancul di cjoilu e lu ai ancje let subit.

Son contis, us ai dit.

E ancje disint cussì al devente istès un pôc dificil rivâ a metilis in rie, dividilis o messedâlis, chestis contis.

Eterogjeneitât, e je la prime peraule che mi ven tal cjâf, se ho pensi a "Scûr di lune".

E in chest câs al è sedi il plui grant vant e ancje il prin difiet de antologjie.

Ma a nin par ordin.

Lis contis a van di pocjis riis e cualchidune di 4-5 pagjinis e framieç di chestis misuris a podês cjatâ di dut. Di dut ce vuelial dî? Al vûl dî propit di dut.

Flabis, contis fantastichis, siums, ricuarts, alegoriis, poesiis in prose... Insome, o veis bielzâ intindût che dificilmentri un letôr i plasaràn dutis. Al fâs part de nature stesse di chest libri, chê di contentâ une part dai letôrs. Cun di plui, si percepìs ancje une diference di scriture e di regjistri jenfri cualchi conte, il che nol è un mâl, ma al puès fermâ la leture, jessint il ritmo diferent dai tocs.

A part chest al è di dî che un dai aspiets plui preseabii al è chel di vê metût in ogni conte une idee, un parcè, une clâf di leture che pues jessi cjolte o mancul, ma che e je simpri, ancje ta lis contis plui curtis.

Parcè che mi rivuarde chês che mi son plasudis di plui a son stadi chês di ambit fantastic (come il disco volant a Selvuzzis, tant par dî une) e chês dulà che il Checo, platât intun ricuart dai sie, al rive a movi un sintiment dal letôr. Disìn che al à un so stîl tal butâ jù une pagjine di diari, che al rive a messedâ ironie e vision romantiche, contant robis semplicis cence savê di za sintût o di fals.

Cualchi fature in plui le ai vude tai lei i siums, che a mi parevìn une robute fûr puest, ma no si pues vê dut, e in tal complès chest al è un libri che al lasse un bon savôr e si lei cun facilitât e sveltece.